ភ្នំពេញ៖ ជុំវិញការបង្ហោះរូបភាពដែលផ្សព្វផ្សាយអំពីសារខ្លីៗ នៃអច្ឆរិយភាពទាំង១០ របស់យុទ្ធនាការ «ឆ្នាំទស្សនាកម្ពុជា ២០២៣» កាលពីថ្ងៃទី៣០ ខែមីនា ឆ្នាំ២០២៣ ដែលទទួលបានមតិរិះគន់ពីអ្នកបណ្តាញសង្គមជាច្រើនដែលចោទថាប្រើប្រាស់រូបភាពមិនត្រឹមត្រូវ និងរំលោភលើកម្មសិទ្ធិបញ្ញា ក្រសួងទេសចរណ៍ បានបកស្រាយថា រូបមួយចំនួន ក្រសួងបានស្នើសុំទិញសិទ្ធិប្រើប្រាស់ រូបមួយចំនួនទៀតទទួលបានមកពីកម្មវិធីប្រកួតប្រជែងរូបភាពដែលរៀបចំឡើងដោយក្រសួងផ្ទាល់ និងរូបភាពដទៃទៀត គឺទទួលបានពីប្រភពបើកចំហ (Open Source)។

បន្ទាប់ពីក្រសួងទេសចរណ៍បង្ហោះរូបភាពនៅលើទំព័រហ្វេសប៊ុកផ្លូវការរបស់ខ្លួនកាលពីថ្ងៃទី៣១ ខែមីនា ឆ្នាំ២០២៣ ផ្សព្វផ្សាយអំពីសារខ្លីៗនៃអច្ឆរិយភាពទាំង១០ របស់យុទ្ធនាការ «ឆ្នាំទស្សនាកម្ពុជា ២០២៣» ក្រោមពាក្យស្លោក «គ្រប់ថ្ងៃគឺជាអច្ឆរិយភាព»ក៏មានអ្នកលេងបណ្តាញសង្គមជាច្រើនបានចូលទៅបញ្ចេញមតិរិះគន់ថាក្រសួងប្រើប្រាស់រូបភាពដោយរំលោភលើកម្មសិទ្ធិបញ្ញា។

ក្រសួងទេសចរណ៍បានអះអាងថា រូបភាពដែលប្រើប្រាស់ក្នុងយុទ្ធនាការខាងលើ គឺជារូបភាពដើមរបស់កម្ពុជា។

ក្រសួងបញ្ជាក់ថាខ្លឹមសារនៃអច្ឆរិយភាពទាំង១០ គឺជាផ្នែកមួយនៃវិធានការគោលនយោបាយអនុវត្តយុទ្ធនាការ «ឆ្នាំទស្សនាកម្ពុជា ២០២៣»របស់រាជរដ្ឋាភិបាល ដែលរៀបចំឡើងក្នុងគោលបំណងផ្សព្វផ្សាយអំពីសក្តានុពល ទេសចរណ៍ សំដៅស្ដារ និងលើកស្ទួយវិស័យទេសចរណ៍កម្ពុជាបន្ទាប់ពីទទួលរងផលប៉ះពាល់ពីវិបត្តិជំងឺកូវីដ-១៩ ក៏ដូចជាលើកកម្ពស់កិត្តិនាមព្រះរាជាណាចក្រកម្ពុជា និងជំរុញកំណើនសេដ្ឋកិច្ច-សង្គម តាមរយៈការបង្កើតការងារ ដោយផ្ទាល់ និងដោយប្រយោលពីវិស័យទេសចរណ៍ ។

ក្រសួងទេសចរណ៍ អំពាវនាវដល់សាធារណជន បញ្ឈប់ចែកចាយបន្ត និងកែតម្រូវការបង្ហោះ និងផ្សព្វផ្សាយព័ត៌មានដែលមិនត្រឹមត្រូវទាំងនេះតទៅទៀត ចៀសវាងបង្កផលប៉ះពាល់ ដល់កិត្តិយស សេចក្តីថ្លៃថ្នូរ និងកិត្តិនាមរបស់ព្រះរាជាណាចក្រកម្ពុជាទាំងមូល។

ទន្ទឹមនេះក្រសួងទេសចរណ៍ លើកទឹកចិត្តដល់សាធារណជន ដែលចង់ចែករំលែកជាមួយ ក្រសួងទេសចរណ៍នូវរូបភាពពាក់ព័ន្ធនឹងទេសភាពស្អាតៗ បទពិសោធន៍ទេសចរណ៍ល្អៗ និងពេលវេលាដ៏អស្ចារ្យ របស់ខ្លួននៅកម្ពុជា សំដៅចូលរួមចំណែកផ្សព្វផ្សាយសក្តានុពលទេសចរណ៍ ទាក់ទាញភ្ញៀវទេសចរជាតិ និងអន្តរជាតិ ឱ្យមកកម្សាន្តនៅកម្ពុជា ដើម្បីប្រយោជន៍ជាតិជារួម អាចទាក់ទងមកកាន់ក្រុមការងារតាមរយៈលេខទូរស័ព្ទ ០៨៦ ៤៣៣ ៣៨៦៕